Asa lawas banar kada maliati blog ulun. Diam kada diam satahun asa hanyar samalam bulan puasa - neh datang lagi bulan puasa. Masa wayahini asanya lakas banar bajalan. Asa kada kawa handak manyasahi. Kaya ulun ni amun dibari paluang, asa handak masa dibulik akan asa handak lagi kahidupan wayah kakanakan. Wayah kananakan amun rahat bulan puasa ni nang paling arai asanya. Bulan puasa kami kakanakan sapa'adingan u'umpatan jua bapuasa. Umpat bangun subuh hagan basahur. Imbah sahur guringan pulang. Uma bapa tulakan bagawi. Kami ka sakulahan. Sakulah tumat pagi sampai ka patang. Ka sakulahan pulang tuh bajalan batis. Jauh...amun dikira mau sabatu jauhnya. Sakulah pagi (kebangsaan) habis pukul 1.00. Pukul 2.00 sambung pulang sakolah patang (agama) sampai pukul 5.00. Bulik bajalan batis pulang. Disia'lah datangnya karungkung kahausan. Ya'am balajan jauh ari pulang rahat hangat. Bapaluh landiran bajalan. Jadi amun kada tahan tu kami sambil bajalan malalui rumah ka, kabun urang ka, ma'indap mana ada banyu', mana ada apanya'ai nang hingkat di minum atawa di makan. Amun talalui guri urang nang hibak banyu nya' - tuan rumahnya kada karasa'an kami cuntan banyu' dalam guri tu hagan diminum. Amun tatamu apa-apa buah ka di kabun urang gan kaya' itu jua. Hajannya buah kanaslah. Kanas (nanas) anum gan jadiam. Mun musim buah rambutan lagiam ungah, siap babawa bulik ka rumah. Bapadah awan uma bapa jah dijulungi kawan. Tapi uma bapa tahu'ai tuh buah cuntanan..siaplah kami kana tali pinggang. Babirat-birat awak kana talipinggang atawa gatah baladar basikal.
Kami kada tapikir kada'am pasal baju ari raya. Apa nang uma bapa tukarakan kami pakai. Hajinnya mun baju melayu tu nang kaler putihla...nyaman dipakai sakali hagan sakulah agama. Kasutnya pulang gan putih jua. Gan hagan dipakai ka sakulahan. Kasut putih tu pulang palastik - jadi hujan dan panas , basah ka karingkah hingkat haja dipakai. Hagan babuka puasa gan kami kada kisah. Apa nang ada disadiakan uma bapa kami makan kada banyak komplen. Malam kami ka masigitan tarawih. Mun nasib baik ada urang ba'antaran "moreh" dapatlah kami makan nyaman sa'ikit imbah tarawih. Urang tuha' batadarus kami mahantus moreh.
Wahini...hanyar sahari puasa urang sudah bakira handa' manyambut ari raya'. Kada sa'ikit duit nang dipakai hagan manyadiakan sarabanya nang hanyar haja. Inya' urang wayahini bakamampuan teh..tapi jangan kalumpanan banyak lagi urang nang kasusahan. Amun ta'ingat masa-masa susah hampian kahidupan wahini 1000 kali labih baik. Babanyak basyukur dalam kahidupan mudah-mudahan Allah manambahakan lagi nikmat kahidupan. Esok masuk 2 hari puasa - adalah kita nang tahaga sudah bakira-kira handa' mambayar fitrah?.. dapatkah mahabisakan Quran sajuz sahari?...atawa lagi bakira-kira barapa budget hagan ari raya neh?? apa handa' ditukar hagan babuka puasa esok? Patutnya bulan puasa ni kita lagi jimat babalanja. Inya' makan hanya 2 kali sahari kan?.
Tiada ulasan:
Catat Ulasan