Satahun dua nih gigir sa'alaman urang bapandir pasal facebook (FB). Kada kiralah, nang anum kah, nang tuha kah (kaya ulun nih), nang kakanakan lagi kah samua'an ba'isi FB saurang. Amun dahulu ada ba'isi email gan asa arai hudah. Tapi wayah ini mun kadida FB tu kira kada ma'umpati paredaran zaman jah. Ulun gan saparanakan umpatan kaya urang jua ba'isi FB saurang sa'uting. Tapi bini ulun kadida ba'isi. Inya kada bisa ma'udak computer ya'am, apalagi handak FB. Mun sasakali inya hadak bapandiran awan kakawanan nyak nang jauh, bahiyau inya minta disambung hagan "skype" awan kawannya.
Nang ini ulun handak basurah pasal ulun tahagak awan kakawanan lawas di FB. Kawanan sakampung, kawanan sa sakulahan atawa kawanan di tampat pagawean lawas. Mun kakawanan tu ma'andak ngaran masing-masing awan ngaran asal asa nyaman jua handak tatamu. Tapi trend urang wayah ini arai lukuk amun ma'andak ngaran nang kaliatannya lain dari yang lain. Macam-macam ngaran samaran / nick name di andak. Mun ada gambar kada pati ba'ubah muha, kawa jualah pinandu. Amun kada pakai kada batagur sapa walau balanggar bahu di FB.
Ada dua ikung kawan ulun wayah sakulahan hulu nang ulun tahaga di FB ni. Sa'ikung pulang nang paling hanyar hari nih. Kawan tampat sapagawean tahun 90'an di Malaka.
Dua ikung kawan sakulahan ni, kadua-duanya "jawa". Saikung tu nang ngarannya "Paimin" memang ulun sudah pinandu tumat sakulah randah lagi. Tapi ulun sakulah lain, inya sakulah lain. Kami pinandu pasal salalu balumba bukah. Mun ada sukan jamputan balumba bukah baganti-ganti sakulah kami salalu masuk final. Paimin palumba last, ulun gan jua bukah sebagai palumba ka'ampat. Amun kada pasukan sakulah ulun manang - sakulah Paimin manang. Sampai ka sakulah manangah Paimin ni kaur lagi laju balumba bukah, tapi ulun ba'ansur "pencen". Lagi sa'uting Paimin ni sa'urang student otak cair ( ada saikung lagi nang otak cair nih, ngarannya Mohd Salleh Abu - dangar kabar hudah Professor, tapi kada tahaga dalam FB). Dalam kalas kada suah dapat nombor bawah dari no. 3. Tapi nang herannya si Paimin awan kakawanannya tu di klas duduk balakang sakali. Mun cikgu ma'ajar tu, inya memainan banarai. Ada sakali tu rahat cikgu ma'ajar inya hingkat main kapal tarabang karatas dalam kelas. Kana hukum badiri atas bangku ha ha ha.. kadanya tahu supan inya. Masa ba'ulah uji kaji sains di makmal, inya bagana dalam laci makmal. Kaluar laci tu hagan manyalin kaputusan uji kaji tu atawa waktu kelas dah habis. Tapi memang dasar urang otak cair ... kaputusan pariksanya tatap menakjubkan. Imbah SPM kami tapisah. Paimin masuk sakulah science, imbah tu masuk 2 universiti balajar sampai sarjana. Wayah ini bagawe senior manager petronas di Tawau.
Carita lagi saikung kawan ulun ni ngarannya "Aliman". Nang ini asalannya student biasa-biasa kaya kami jualah. Habis SPM inya bagawe karani di Maktab Parguruan Mohd Khalid Johor Bahru (wayah ini kadida lagi maktab ni). Imbah bagawe babarapa tahun inya masuk UM ma'ambil Law. Grad inya jadi majisteret. Wayah ini inya Hakim Kanan di Mahkamah Sesyen Johor Bahru. Bininya doktor. Ujarnya bapadah awan ulun bulan 7 nih inya handak option pencen awal. Kanapa? ulun batakun. Inya bapadah handak balajar bahasa Arab awan mahapal Quran. Uma'ai kawan ulun nang sa'ikung nih bakal Al-Hafiz kaina' leh...
Saikung lagi kawan ulun (tahagak hari ni) ngarannya "Aziz". Nang ini kawan ulun masa bagawe di Malaka (Alor Gajah) akhir tahun 90'an. Aziz ni rajin, ramah dan suka manulungi urang. Sapa'ingatan ulun Aziz nilah nang hajan manukarakan nasi bungkus makan tanagahari ( ulun kulir handak kaluar ofis ). Wayah ini Aziz ni hudah jadi tokeh ayam!!. Sayangnya Aziz ni supan handak ma'andak gambarnya di FB. Diandaknya gambar matukah habang...ha ha ha ha.... Lagi sa'ikung ni - ni kada tahaga di FB, tapi batamuan dalam laman blog. Kakanak nilah urang partama comment blog ulun. Ulun mahiyaunya "Emon". Tapi ngaran bujur kakanak nih Mohd Nazri (urang banjar kaya ulun jua - tapi banjarnya gan .. alahai .. kaya ulun jua). SI Emon wayah ini rahat sakulah lagi di Kolej Univ. Nilai. Ujar inya rahat balajar kaya apa handak ba'ulah bom nang kada babunyi awan kayapa handak manjadiakan rumput karing jadi not RM100.00 keh keh keh... Si Emon ni mahiyau ulun "abah". Walau kami kada suah batamuan tapi asa rikit haja kaya bapa awan anak.
P/s : Tapi kanapa ulun kada hingkat tahaga kakawanan lawas babinian di FB lehh???
