30 Julai 2011

SELINGAN LAGI

SELINGAN

CARDAP COPY PASTE AWAL PUASA

Esok mun kada ada apa aral puasa'an kita umat Islam sunyaan. Aral napanya lagi?. Datang bulankah andika?. Hehehe..kadanya lalaki datang bulan pulang leh..tahuwam mun ada lalaki wayahini nang datang bulan mun bulan puasa. Mun mangaku "gastrik" tuh banyak hahahaha..bulan puasa haja gastriknya datang, mun bulan lain wagasan haja. Lakas banar masa bajalan. Asa hanyar lagi Ramadhan, ni manampuh Ramadhan lagi. Pada samua bubuhan kula'an,pa'adingan sabarata'an - ayuha' puasa - jangan kada puasa. Hagan pamulaan bapuasa esok ulun mangaradau lagi sabuah cardap ( carita handap copy paste ) tumatan panulis asalnya PUPUDAKMATAI.
MANGARADAU URANG BAHARI.
"Anak hayam dibawah tungkup tu cuba’an dibarie’e makan" ujar Uma Utar pada si Asatluhaw laki si Uma Utarnyak.. Takipek Asat luhaw nang hadang mandam dihiga lawang dapur.Gagarunum si Asat surangan sambil mahambur jagong awan mangandah mahawar hayam jagau nang ma’a’uur anak hayam nang dibari’inya jagong tuh. Bakuciak sakali lagi Uma utar-“Ooo abahnya’ tulakkam kakadai setumat, tukarrakan nyiur awan minyak lamak ujar Umautar, ako handak ma’ulah pupudak, lawas banar kada ma’ulah tarasa rakongan ni handak makan pupudak”. Asat luhaw kada banyak surah tarus ma’ambil tilasan dibanturan lalu mandi.Talah mandi lalu mamuruk baju hanyar, suroi dipaket tacungking kada katingalan tapi kasut lawas nang udah rumpis magun dipuruknya lagi. Asat luhaw mananjak basikal kapasar lambak diSG BP parak haja tumat rumahnyak. Imbah betutukar tarus bulik. Sampai dirumah hari mulai kadap lalu Asat luhaw bagagas pulang handak ka masigid. Dimasigid kakawanan jama’ah udah sampaian. SiAcil,Wak Min,Oos udah sampai huluan,tapi si Isa kada kaliatan. Imbah sumbahyang Mahrib sunya’an bapandiran diambin masigid sambil mahadangi waktu Isak.Tiba-tiba Asat luhaw mangawil abang Oos tukang bang. "Bang! Isa udah masuk tuh”. Kalihatan Si Isa dalam kadap mamasuki kawasan masigid .Abang Oos tuli sa’ikit lalu tanpa banyak bersurah bingkas bangun tarus 'Bang Isyak'. Apalagik gigir samasigitan. Sabujurnya waktu Isyak balum masuk lagi tapi Si Isa hudah bang (azan). Silap punya pasal rakai sunyaan.Kanalah hadangi waktu sabujurnya. Imbah sumbihyang ada mutala’ah awan ustat kampung.Tajuk mutala’ah tantang puasa. Ada jua sapalih jamaah bangsa jawa. Wak Min (jawa hidin nih) tarus batakun pada ustat. "Betul ke makan disiang hari ditegah " ujar Wak Min pada ustat. Ustat manjawap “Bujurrai diTEGAH, tapi ada jua orang makan di padangTAGAH”. “Nang makan ditagah amun kada kaliatan orang, kada apa am luko !!” si Acil mahaharampot, gigir tatawan samasigit. Sabulinya’ dari masigid Isa,Oos,Wak Min sawat singgah karumah kulaan O0s, handak maniring Utoh Gancang nang rahat garing kada hingkat makan. Bini Utuh Gancang nang lamak putih mampilak manyambat si Utoh Gancang lakinya’ tuh handak banar makan pais, tapi bini Utoh Gancang kada asap handak manyuapakan.”Napang ngam ikam kada mau manyuapkan!!, kada baik durhaka” jar si Isa pada bini Utoh Gancang. “Ano..... laki ku ni handak pais tahik.Handak kada handak ko ulah hai jua ada ai ditanggar di dapor lagi tuh” jar bini Utoh Gancang kasupanan. Sunyaan takipek kahiranan ,kanapa am jadiannya si Utoh Gancang ni nang kada karuan di’inta. "Mana pais nya’, hudah masak kah balum" jar Utoh. "Cuba’an ai dirasa’iee hulu ikam sunyaan nyamankah pais tu!” ujar Utoh lagi.Tarasa muak,handak muntah galiyanan ,rigadnyak."Dahandak ako !!” ujar bini Utuh Gancang. Habang muha Utoh Gancang kasarikan sambil manggarunum nyaring "Amon nang wagas kada handa’ makan pais tuh. apa lagi ako nang garing nih " marista kaliatan bini Utoh Gancang.Takuriheng kami sunyaan.Bujurrai bangat garing siUtuh ni, apa hudah di luhawwinyak kita sunyaan atawa apaapa an naah. Minik ako. “Lawas hudah disiya’, ba’isur hululah” ujar Isa ka Utoh.Gancang. “Ayuhak” jar Utoh Gancang. “Tarima kasih haja,berilaanlah” sambil basalaman sabarata’an.

17 Julai 2011

MANUREH GATAH

Gawian manureh ini kada kaya urang babandang, Bagawi di kabun gatah ni hawai banar kada raramian macam urang badarau. gawian manureh ni suranganan haja am, bahanu palilngau-palingau, manalah tahu ada sawa kah, ada tadung mura kah. Amun manyuloh lagi am, lampu talabang dikapala, asa baburinjing puhun gulu tadangar bunyi nang kada mangaruan. Bangun papagian, jar tulak ma'ajar. Penselnya tupang pisau turehan. Pisau ni ada dua macam, sa'uting nang kaya hurup J, dipakai aci tarik, amun manureh ba'undur burit mangulilingi pokok gatah.
Nang samacam lagi lurus saikit, pakainya aci suduk. Ada jua yang disambung awan kayu, amun turehan tinggi. Pakakas lain, timba awan tong hagan maisi gatah. Jangan kalumpanan mambawa sangu! Amun jauh, tulak babiskar, tong di ikat diancak balakang. Sampai dikabun, andak pang biskar ditungkati atawa disandarkan haja dipohon gatah. Di turunakan tong awan timba, langsung ai manuntii pohon gatah. Pamulaannya, di kaluarakan gatah baku dalam cawan awan dijujuti gatah sagarit bakas turehan samalam, dikumpulakan dibuat dalam wadah, timbakah atawa tim yang diikat dipinggang. Imbah tu hanyar ditureh maikut alurnya. Manureh ni kada sabarang tureh haja, kana dijaga jangan sampai luka, takusasai sampai ka kayu, kaini rusak pokok, bakunat. Gatah nang kaluar ditanai awan cawan gatah. Amun cawangatah kada ada atawa sudah pacah, buleh haja digantii awan ciduk atawa pot susu. Kaya itu pang baalih dari sapokok ka sapokok sambil kalipakan batapak nyamok. Amun yang gancang bagawi mau ai talah sampai tiga ampat ekar tanah. Amun diukur mau pang ada lima anam kilo baja lan. Limbui paloh saawakan.Samantara, gatah malilih kadalam cawan, barehatlah satumat,sambil maungkai sangu. Hubi kayu bajarang kah, limping pisang kah, awan kopi-O. Apa-apa haja sunyaannya nyaman. Mariga kakanyangan basandar dibanir kayu. Nyamannya leh amun tarus guring haja, tapi tapaksa manyambung gawian. Sambil manginting timba, juuk-juuk pulang dari sapokok ka sapokok memungut susu gatah. Susu gatah dituang kadalam timba, cawan dipulir awan ibu jari. Cawan diandak pulang ditampat asal hagan mananai gatah yang masih malilih lagi, esok hagan diambil hagan gatah buku . Sasadang saparu timba, gatah yang dipungut tadi diudal kadalam timba/ tong yang taganal. Amun kada rihu pang tangan manjinting. Wayah mamungut ni kana bahati-hati, takutan tasipak tunggul, mau pang tajurangkang, napa am , takacak bigi waloh lah, panat nang dapat, pakulih habis malijau tanah. Imbah talah mamungut, pakulihan dibawa bulik hagan dimisen. Biasanya misen gatah ada disarubung parak awan rumah. Susu gatah tadi ditapis hagan mambuang ratik awan ma'asingakan gatah gatah bukunya. Sadiakan citak hagan
ma'isi gatah nang ditapis tadi. Citak ni di'ulah dari tim minyak gas dibalah dua dan dilipih higanya supaya kada tajam. Tuang susu gatah dalam citak barang dua inci, tambahi awan banyu barasih, awan ubat gatah (cuka gatah) barang sasuku cawan haloi sambil diharu sampai likat. Campuran banyu awan gatah ni labih kurang gatah dua bahagi awan banyu sabahagi, amun takurang banyu, gatahnya jadi karas, ngalih handak dimisen, amun talalu banyak banyu jadi lambik, aur panggal haja bila dimisen. Gatah dalam citak ni dihanyaakan barang lima balas minit sampai gatahnya baku. Sawat jualah nginum awan bagusuk tangan, batis yang bagatahan. Ini masa mainjin/ mamisen pulang. Gatah dalam citak tadi di talangkupakan. Gatah yang kalunuran kaya lingkong tadi ditikin-tikin . Manikin ni gin ada tekniknya, supaya kada takincung, nang bagusnya musti ampat sagi bujur. Tikin lagi supaya jadi nipis, amun kada cukup nipis dijajak ai awan tumit. Imbah tu hanyar gatah tadi disurung kamisen, kaya urang mamisen air tabu tu pang. Pamulaannya misen licin, diulangi dua talu kali, mulanya tabal imbah misen tu dipisiti supaya sampai bujur-bujur nipis sakira ¼ inci. Last sakali disurung ka misen bunga. Masa mainjin nilah biasanya kakanakan disuruh mangganii. Kasian haja ah, taingkih kakanakan ma'ulai. Akhir sakali, gatah nang dimisen tu dikaringakan atas dadaian buluh. Imbah makan tangahari, ta'ampar taguring di tangah ruang rumah sampai patang. Ada lagi gawian nang musti di'ulah iaitu ma'asah pisau ( ma'asah pensel la
lakon nya' - inya bagawi cikgu ya'am ) amun kada isuk papagian kanalah bangun awal. Pisau amun kada tajam, tuhuk mengarukut turehan, lagi jah gatahnya kada banyak. Kaitulah hari hari pagawian urang manureh gatah. Kada ada sing cutian, tap ada jua cuti istemewa barian yang maha ilahi: amun hari hujan, balingkur lah malandau sampai ka tangahari.

Panulis asal:

ba.ra.nga Tue Jul 31 17:40:11 2001

10 Julai 2011

LAGI MANGARADAU ...

“Utamakan Bahasa Melayu” hihihi…ayuha' amun bapandir awan “malaysian”. Amun sama’an awan kita banjar neh basurah banjarla labih utama. Mun kada basa ibunda kita makin kalumpanan, makin rakai. Ari minggu arini. Kadida papa handa’ di’ulah. Ayupang kita manereng julaknya mangaradau.

URANG BAHARI, URANG WAYAHINI.

  • Urang bahari barumah kayu,
  • Urang wayahini barumah batu.
  • Urang bahari bajalan batis,
  • Urang wayahini makan Mercedes.
  • Urang bahari manabang hutan,
  • Urang wayahini manimbun hutang.

URANG BUJANG, URANG KAWIN.

  • Urang bujang bagawi siang,
  • Urang kawin bagawi siang malam.
  • Urang bujang basaung hayam,
  • Urang kawin basaung malam.
  • Urang bujang guring surangan,
  • Urang kawin guring bagampir.
  • Urang bujang mangiming hintalu,
  • Urang kawin mangiming bintalu.
  • Urang bujang hidup manumpang,
  • Urang kawin hidup batumpang.

URANG ANUM, URANG TUHA’.

  • Urang anum balumba haram,
  • Urang tuha’ nang marasa saram.
  • Urang anum tulak balalah,
  • Urang tuha’ ngaleh ba’alah.
  • Urang anum nampayakan pusat,
  • Urang tuha’ mata tabalalak.
  • Urang tuha’ tuhuk mamadahi,
  • Urang anum kada patian paduli.
  • Urang tuha’ aur manata’,
  • Urang anum kada bamata’.
  • Lagi anum balumba haram,
  • Hudah tuha’ ma’ulah anak haram.
  • Lagi anum kada balajar,
  • Hudah tuha’ kurang ajar.
  • Hudah kawin mangaku bujang
  • Bini dua mangako duda
  • Rambut bahuban disapu kasumba
  • Hudah janda tapi kaya anak dara
  • Baju handap manampai dada
  • Urang maniring tabalalak mata.

Panulis asal : Julaknya Mangaradau.

08 Julai 2011

3rd - SICAKAH

Cuti mardika ari tuh ako sawat mantuk ka kg. Ada urang basaruan aroh pangantin jah. Carita pasal aroh nih taganang kisah bahari. Wayahitu kabila aroh haja rami pang urang takumpulan , badapatan lawan kakawalan..kukulaan nang parak lawan nang jauh. Kabila takumpulan haja rami pulang bakisahan , bapandiran imbahtuh pulang bahulutan tarus bagayaan. Mun wayah bagawi pulang rami badarau. Kada aci catering2 ilah damini nih. Saja rami. Jadi pada satu aroh tuh ilah rajin pang rami urang bakisahan. Kami sakumpulan duduk bapandiran dipinjung rumah. Kulir bagawi pa an. Ako nih nang paanomnya...kakanakan lagi wayahitu. Jadi duduk kacungkungan mahadapi lawan mandangarakan nang tatuha bakisah. Dalam banyak2 tuh ada saurang tuha nih ku hiyau angah Tulamak (ngaran incaan).Hidin baistilah handak mamugai pandir manyulam kisah. Hidin nih saja terkenal cakah lamun basurah. Mun basurah tuh inya haja nang pawaninya, nang pambungasnya...samuaan inya pang. Kada hakun kalah. Tu nang muyak urang mandangar tuh. Hidin gin mula bakisah.." Ako wayah bahari saja hibat..ikam taholah. Mun kakanakan wahini kada talawani lawan ako. Ako halam suah masuk ka hutan cagaran handak mancari buah binjai. Bilang batuhukan mancari hanyar tahaga pokok binjai. Maka ganal pokok tuh kada hingkat madahkan ako. Ako gin mula manabang..tabang punya tabang kada karasanan bilang babulanan hudah kada jua mau rabah. Ku tabangi lagi..parak ma’anam bulan hanyar tadangar bungi marakut..kruk..krek..kruk ilah bungi pokok handak rabah. Ku hadangi tagal kada jua mau rabah. Imbah tuh parak manalu bulan pulang hanyar rabah ka bumi. Dummm...tumbur saalaman mandangar bunginya. Kabila rabah haja tarus ako mamilihi buahnya. Umaiii maka banyak. Parak malima gadur ada asaanko. Talah mamilihi ako gin basasadi handak mantuk. Kabila sampai dirumah haja ku julungi sapalih nu kakawalan nang parak. Andihku ku taruhi..ku wadi..imbah tuh parak malima tahun pulang hanyar talah mamakani. Bilang mauk lawan binjai pang. Nginto pang kisahku bahari ", ujar angah Tulamak kaungahan Bilang mancungit hidung hidin. Asa arai banar tukohnya. Asaannya kadaida lagi nang hingkat malawani kisahnya tuh. Sakalinya angah Tuhirang (ngaran incaan jua) nang tumatan tadih ranai duduk dihigaku basurah. " Ikam talah ka hudah Tulamak ai. Nih ako pulang handak bakisah ". Angah Tuhirang mula manyulam kisah. " Ako ada ai jua baisi kisah tagal kada am hibat banar ilah kisah Tulamak tadih. Halam ako suah tulak manabas di kabunku nang di banat tuh. Wayahitu kabunku tuh bilang tagah banar. Rumput halalang bilang tinggi banar mun babuat langsung kada katampaian awak nih. Mun ada gin kapala ha nang cangulan. Kabun tuh lawas hudah kada di gawi’i ya am. Jadi wayah baisukan tuh ako gin tulak ka kabun tuh. Ancaman handak manabas tadih ti pang. Ako gin mula manabas. Tabas punya tabas kada karasanan hudah talah sakapingan ku tabas. Lingai hudah ku tireng. Ako gin bamandak tarus baampih manabas. Uyuh pa an. Wayah rahat handak basisimpun tuh babaya aku handak manaruhi parangku tuh ku i’itihi ada darah malikit.Banyak pulang tuh. Matan mana datangnya darah nih ujarko. Hiran jua taholah. Ako gin mula mamariksa kaluko ada tarawis apakah. Sakalinya saja banaran. Wayah aku tulak mai’tihi intang kabunku tuh ada tahaga batis kancil bahamburan. Banyak pulang tuh. Rupa-rupanya wayah rahat ako manabas tadih ako tarawis jua batis kancil..imbaham pagatan samuaan. Nah..kada ku hadang lagi..tarus ku pilihi batisnya. Umaiiii maka banyak..parak malima bakul taholah aku bulihi. Nginto batisnya haja..balum awaknya lagi ", ujar angah Tuhirang manalahakan kisah sambil mangilar ka angah Tulamak. Imbahtu ku tireng angah Tulamak bilang habang muha. Marangut-rangut kakalahan tarus baisur. Napa pang lagi tarus tatawaan ai sabarataan ma’itihi angah Tulamak kakalahan surah.
Panulis asal : Ujik Jabis (3/9/2001)

2nd - TAGANANG

  • Limbah maunjun ako manangkoi,
  • Iwak nang banyak kada tahirani,
  • Mandam taganang wawayah haloi,
  • Napa diulah sunyaan rami....
  • Wayah haloi mainan bersama,
  • Bagarit burung amon di huma,
  • Kulir mangaji diinjing talinga,
  • Kulir bagawi dimarahi uma.....
  • Banyak bakubang talinga bacurik,
  • Banyu malilih babau harok,
  • Amon mangalau kalumpanan bulik,
  • Habis saawakan babau harok....
  • Bagarit burung padi gen linak,
  • Buburak dipingkalong rabah tajungkang,
  • Burung saikong, urangnya banyak...
  • Arini bakalahi isoknya bakawan nai pulang.....
  • Bila taganang wayah babandang,
  • Bagawi badarau mananam padi,
  • Wahini jauh di tampat urang,
  • Bisa-bisalah kita mambawa diri...
  • Anak kita buta bangsanya....
  • Ilat dah karas, bahasa ntah kamana...
  • Ayuha kita bagabung barsama...
  • Biar Banjar hidup di dunia...

Panulis asal : Utoh Kidok ( 24/8/2001 )


1st : MALING MATI DI HIGA RUMAH

Ada tiga ikung maling handak mancuntan di rumah urang. Inya mahintip sudah bajam-jam balukup kanyamukan di balakang rumah, manunggui urangnya guringan, tapi urang nang ditungguinya ini kada mau guring-guring, cakikikan haja tatawaan mulai hintadi, "Hanyar bakakawinan kalu" ?, ujar maling nang dibalakang, babisik. "Kita musti cari akal, manggawi urang rumah ini", ujar nang di tangah. "Kaya apa akal ikam ?" nang di muka batakun. " Ikam badua cari bigi "Timbatu Hanau" nang masih anum diparak sini. Bigi Timbatu Hanau itu, ikam randam kaina dipabanyuan dapur itu, Inya nang di rumah itu pasti pang kaina babasuh lawan banyu nang ta campur gatah timbatu itu, biar inya marasakan kegatalan amun kana." Ujar maling ditangah nang pinamaharati, manggurui. Kada lawas rancana itu dilaksanakannya. Dasar babanaran, kaduanya pangatin hanyar itu babasuh kacipuk-kacipuk di pabanyuan itu. "Nah tunggui satumat lagi" ujar maling nang hanyar ma-andaki timbatu tadi. Babaya masuk, si urang rumah ini mulai marasa kagatalan. "Umai gatalnya, kana alirgi apa aku nih" ujar nang bini sambil manggaru-garu tampahanya. "Sama lawan diaku, kalu kaya itu, aku gin kagatalan jua ini, maka liwar gatalnya" ujar nang laki kada kalah sangitnya manggaru rudalnya sampai bahabang-habang. Muyak nang bini manggaru. Pa-ampihannya diambilnya babat pinggang dilamari, dikarutnya hujung babat sabalah diturus tawing kanan, sabalahnya lagi diturus tawing kiwa, pas nang kaya tali kakanakan main tali itu, lalu dilingkangi nang bini tali itu, lalu sruuut ... kamuka, sruuut ....ke belakang ... sruut kamuka .. sruut ke belakang, terus haja kaya itu pina kada tahu-tahu. Si maling nang batiga tadi, mahintip dilubang tawing sambali babanyuan mata manahan tawanya. malah nang badua kada katahanan lagi lalu bukah maninggalakan, nang saikung tatinggal kada kawa lari, sakalinya mati saurangan, manahani tawanya.
Panulis asal : SURYADI

BLOG BASAWANG

Uma’aiii… lawas banar ulun kada menggulagai blog ulun neh. Amun parumahan hudah basawang sakuk. Dasar pangulirkah ulun ni kaluku’. Atawa bujur banyak gawian banar saharian hingga kada sawat maniring blog saurang. Handak ma’upahakan urang “up date” pulang, taga saurang pulang kada baduit. Asa kada purun pulang amun handak dikapitingakan blog ulun neh. Dimana di mapa lagi wadah ulun handak practice basa ibunda ulun neh?. Jadi arini ulun asa’an handak jualah hajan up date blog kaya urang nang kada pangulir tuh. Kayapa akal hagan lakas awan sanang ma’isi blog.. ?. Apa lagi ulun kana mancari entry / post banjar di internet .. copy paste… hik hik hik… tapi ulun jamin kada mangaku artikel copy paste tu gih ulun. Ngaran panulis asalnya ulun sisip jua di panghujung entry tu .. ha ha ha.. asal blog ba’isi. Babarang haja. Asal ba’isi.