Bahhh…. asa lawas banar ulun kada mancangul di sia. Tumatan imbah saminggu puasa sampai neh hanyar tahaga’ asa handak mangatek keyboard ma’isi’i blog ulun. Iya asa kaya kakanakan jua ‘ai hari-hari menereng facebook haja ya’am – blog wayahini kada patian bisa lagi diharagui.
Tahun ni ulun bulik cuti ari raya awal. Ari Jumaat ari raya, ari salasa ulun hudah mulai cuti. Patang ari sanayan babaya talah bagawe, singgah ka rumah satumat, sumbahyang asar, ma’isi’i kampil awan kain baju ulun awan anak ulun, si Esan awan si Tuah bulik ka Spg Ranggam. Bini ulun awan Ita hudah bulik dahuluan. Arep awan Along nya dudian imbah talah gawean awan kuliah. Esan men’drev’ matukah. Ulun guring banar. Ulun tabangun imbah malalui tol Spg Ranggam. Babaya sampai ka rumah labihkurang 10 minit waktu babuka. Malam kami taraweh di rumah.
Sapanjang ari salasa kami saparanakan basisimpun rumah kaya urang lain nang handak manyambut ari raya pang. Ulun laki bini ba’ulah gawean dapur di tingkat bawah haja’. Kakanakan pang sapa’adingannya basisimpuan di atas. Patang nya Arep awan Alongnya sampai. Tarus haja anak ulun nang badua tu sasama’an bahimat basisimpun. Kami taraweh di rumah jua malam tuh.
Ari Arba’ papagian ulun awan bini ulun ka PPNJ Machap manukar hayam awan daging. Di sia hayam awan dagingnya murah ( murah giler ja kakanakan wayahinih ). Hayam sakilo RM3.90. Daging sakilo RM12.50. Amun manukar di pasar musim handak ari raya neh..daging hayam RM7.20 sakilo, daging lambu RM18.00 – RM22.00. Tapi handak manukar tuh…ngaleh banar. Urang banyak banar. Ada nang manukar hayam sampai 1,000 ikung saurang ( ni handak bajualanla tuh .. ). Tahaga hayam / daging murah tu bini ulun batakun “….kita buat open house raye ke 3?”. Ja ulun amun hingkat awaknya bahimat bamasak ayo hajalah. Apalagi bini ulun mamborong bahimat hayam awan daging + hagan uma di kampong. Imbah tu batutukar pulang sarabanya rampah ratus hagan bamasak upan haus tu pang.
Parak tangahari kami saparanakan sampai di kampung ulun. Sawat jua manukar wadai hagan babuka puasa. Tumat awal puasa hampai lagi 2 hari handak ari raya hanyar ni hingkat babuka puasa awan uma bapak. Bapalak banar bacarian ya’am..Patang tu ulun ju’uk-ju’uk ka bazaar Ramadan kampung ulun. Mahaaiii.. ari raya lagi 2 hari tapi bazaar kaya hanyar puasa 2 hari. Kadida urang babilanjakah?. Banyak nang bajualan pada nang manukar. Imbah kulilik-kulilik sabalum bulik ulun manukar jualah banyu’ asam boi 4 palastik jangan bulik tangan kosong.
Kamis. Papagian lagi uma awan bini ulun hudah ka pasar bacacari macam-macam hagan dimasaki. Kami nang lalakian ni adala manulungi sana sini sa’ikit. Mun kadida napa diulah tuh apalagi…mahadap laptoplah…facebook!!. Ulun ka kubur. Amun ka kubur kaya urang lain imbah sumbahiyang ari raya jawabnya “jem” sampai ka tangah hari.
Jumahat. Ari raya tahun ni kana Jumahat. Imbah haja sumbahiyang ari raya kami saparanakan tulakan ka rumah mintuha [ tinggal uma bapa ulun laki bini – kakak awan ading ulun balum bulikan … ]. Imbah tu tarus haja ba’ari raya ka kampung kaluarga kami laki bini sampai ka malam. Pukul 11.00 malam talahan balalah. Bini awan anak-anak ulun bulikan pulang ka rumah kami di Spg Ranggam. Isuk handak rewang bamasak upan haus ari Ahad. Ulun bamalam di rumah uma ulun inya isuk ada bara’an / marhaban.
Sabtu. Tahun neh untung jua ari raya kana ari Jumahat. Jadi bara’an kadida. Nang hajinnya imbah haja sumbahiyang ari raya tarus haja bara’an. Jadi tahun neh ulun hingkat umpatan bara’an. Habis sakampungan kami ba’ilang. Tumat rumah nang ba”air-cond” sampai ka rumah nang “kadida letrik”, tumat rumah batu ka rumah kayu, tumat rumah nang batingkat ka rumah nang balantai tanah, wadai nang babagai, tapi kada wadai nang kami cari’i…samu’an kami tulaki. Syahdu…sadih..babanyuan mata – satiap rumah kami bamarhaban dan mambaca doa syawal. Tatamuan awan kakawanan lawas nang satahun sakali batamuan, batakun khabar. Patang – parak pukul 6 hanyar talah. Ulun bulik ka rumah ulun di Spg Ranggam. Malam kapanatan. Kada pati bisa lagi manggani’i urang barewang bamasak. Ading bini ulun saparanakan datangan manggani’i bamasak. Hibak rumah kami malam tuh.
Ahad. Ari raya katiga. Papagian lagi kami saparanakan hudah ba’ulah sarabanya manyadi akan upan haus kami. Bini ulun bapadah – ujarnya urang nang handak datang labih “dari yang kita budget..”. Napa pikiran?. Nasib baik restoren parak rumah kami buka – along sponsor nasi beriayani untuk 100 orang. Pukul 11.00 kaum kaluarga, kakawanan, jiran-jiran nang parak, nang jauh ( ada nang datang dari KL … ) mula datangan.
11.00 malam – kadai kami manyunduk lawang. Kami kapanatan. Handak guring, esok haja bahimat pulang mambasuh periok belanga pinggan mangkok.
