BAPALA'...

Salipar. Salipar japun. Salipar hagan ka jamban. Salipar hagan balalah. Wayah ini urang mamakai salipar Japun ni ka mana-mana' ai. Suah ulun batamuan urang basalipar japun ju'uk-ju'uk di KLIA. Asa'an ulun inya' gagawaian haja' balalah di KLIA. - kada lawas imbah tu' tatamu pulang di balai berlepas - imbah tu taduduk parak pulang dalam kapal tarabang.

NAH..han tia' urang basalipar Japun gan kawa naik kapal tarabang. Kada urang sugih haja' hingkat naik kapal tarabang. Basalipar Japun kada jua jadi kita pinandu inya' urang susah.

Napatia entry ulun kalini maka salipar? Bapala' banar salipar nih..Minggu lapas ulun asa garigitan banar. Kada garigitan awan sasiapa kada'am. Garigitan saurang. Mana kada garigitan - ari Sanayan mulai bagawi'. Babaya' masuk ka pajabat saurang kunyuk-kunyuk mancari'i kunci laci meja gawian. Habis digulagai paket salawar awan kampil gawian kadada' jua tatamu kunci tuhh....

Labih ngalu lagi kapala sarungkuian kunci tu hilang tarait jua awan kunci pati wasi pajabat. Asa'an tatinggal di rumah kalu'. Bulik ka rumah satumat - habis digulagai sagala macam kampil awan paket salawar. Kadada' jua . Bulik pulang ka pajabat. Bapaluhan mamikirakan - ma'ingatakan di mana lakunnya diandak kunci tuh?. Batakun jua awan kakawanan mun ada tatamu - kadada' jua. Handap hudah pikiran ulun mahiyau kakanakan mamacahakan kunci laci meja bagawi' ulun. Talah sa'uteng problem - nih handak mambuka pati wasi ni kaya apa pulang nih?.. masalah nih amun dipacah jua'. Amun tapaksa kana dipacah jua'ai - tapikir pulang mun mahiyau tukang kunci ..... Nasiblah amun admin ada baduit hagan mambayar tukang kunci, salamat duit ulun - amun kada' duit ulun saurang tarabang.

Bagamat ulun manalipun admin (CT Zetun) mangadu hal.....asa handak tapacul salawar ulun kabila inya' bapadah di opisnya' ada sarangkai kunci diatar urang. Ulun batakun "rantai kunci tu selipar tulis Langkawi...?". "Iye...." ujar CT Zetun.

Dasar bapalak banar. Inya' hudah tuhak ya'am. Rahat banar kalumpanan. Receptor otak banyak nang hudah mati kada diganti pugak kalukuk. Adakah bajualan di kadai RM2.00. Mun ada hajin ulun manukar banyak nyaman diulah spare-part.

BULAN HAJI'

"لَبَّيْكَ اللّهُمَّ لَبَّيْكَ، لَبَّيْكَ لاَشَرِيْكَ لَكَ لَبَّيْكَ، إِنَّ الْحَمْدَ وَالنِّعْمَةَ لَكَ وَالْمُلْكَ، لاَشَرَيْكَ لَكَ."

Kada karasa'an kita, kula'an nang tulakan ka Makah handak bulek hudah. Rahat gigir kita ba'ari raya haji awan bakorban di siak bubuhan haji kada pati bisa ba'ari raya kaya kita. Sa'ingat pengalaman ulun wayah ulun ka Makah awan bini awan bapa ulun dahulu' asa kada' ari raya. Bubuhan nang nafar awal bulik ka Makah imbah malontar kalo marasa suasana ari raya. Kami bilang bapanat ulang alik tumat tampat kadiaman ka jamrah. Khemah kami pulang jauh. Kami bajalan batis pukul 2.00 pagi. Mau pang 3 batu sako'. Ulun pulang aur manjaga'i bapa ulun nang kada pati wagas wayah itu. Bini ulun pulang rajakinya kana manggani'i saikung urang tuha babini nang ka Makah manumpang muhrim anak kamanakannya. Malangnya' kabila hampai ka Makah anak kamanakannya aur bakapit badua laki bini kalumpanan sako handak manjaga'i urang tuha' tuh. Wayah itu dibanding wayah ini kamudahannya gan jauh banar. Dahulu amun di Makah tuh nang lalaki diandak 10 ikung jama'ah sabilik. Tiap urang dibari'i tilam nipis. Kadida tampat guringan (katil) di lantai pang. Di Madinah hanyar marasa bagana' di hotel. Tu gan kaya sardin. Syukurnya' masigit haram kada pati jauh awan kadiaman kami. Amun kadangaran azan masuk waktu sawat lagi bukah ka masigit hagan bajama'ah. Di Madinah gan sama ai jua'. Amun diganang-ganang marista jua asa handak tulak lagi ka Makah. Tiap kali kakawanan handak ka Makah asa handak jua'. Tiap kali mandangar kabar urang hudah handak bulikan haji asa kaya rugi kada tulak. Minggu hadap nih Abang Usop & Kak Timah awan Azmin & Dillah insyallah bulikan - mudahan pakulihannya haji mabrur. Awan kakawanan / kulaan lagi anum, lagi wagasan lakasi tulak. Kada payah manunggui "seru". Amun mandangar haja carita urang bahaji kada sama awan saurang tulak. p/s : Ada badua 'somebody' nang pacangan minta ulun manggani'i inya' ka Makah ma'ulah umrah. Ni amun katahuan (????) mau disambatnya 'sponsor a.k.a rasuah'. Mau ulun kada jadi tulak kaya TGNA nang kada jadi bahaji tahun nih pasal dikuyak urang.

NASIB BAIK NASIB BURUK

Sako 2 - 3 minggu neh ulun banyak manumpang kakawanan tulak bagawi. Matukah lawas ulun hudah diatar ka PUSPAKOM hagan dilupusakan. Wayahini rahat manunggui bocer. Jadi amun matukah ulun nang lagi sa'uting dipakai kakanakan atawa bini ulun kada ma'atar ulun manunggui kakawanan dipinggir jalan.

Salawasannya' ulun badiam disiak kada suah asanya lawas ulun maniring kadiaman kami sampai sakit gulu'. Aur tingadah ma'itihi kadiaman 14 balas tingkat. Sambil manunggui kakawanan tapikir jua ulun - uma'ai amun kajadian gampa kaya di Indonesia tu tajadi ditampat kadiaman kami dimapa jadinya lehh?. Suah tahun 2007 wayah itu labih kurang jam 2 pagi kami tabangunan guring mandangar bunyi urang riuh bapandiran. Sakan kami ada urang mauk kah, ada urang basuduk kah, ada kamalingan kah... rupaya ada gampa ujar. Mana kami tahu'. Inya kami bagana' ditingkat lantai ya'am kada marasa baguyangan kadiaman kami. Urang nang bagana di atas maka marasa bangat gagarannya. Tumbur turunan ka bawah takutan kadiaman rabah. Syukur imbah parak handak Subuh samu'an OK. Urang nang turunan tadi naik pulang ka kadiamannya - sambung guringan kaluku'.

P/s : nasib baik kami bagana' di bawah...amun ba'ah pang? "nasib baik kami duduk kat tingkat atas" ujar urang bagana' di atas pulang. Moralnya : ada masa kita nasib baik, ada kala kada.

PEMBUNUH SENYAP

Kada tahu ulun kaya apa handak ma'andak tajuk entry kali ini awan basa banjar. Sako amun kada salah "PAMBUNUH HINIP". Ayuk amun ulun tasalah pakar basa banjar di luar sana bujurakanlah.

Ni pasal sakit jantung. Ca tiring carikan di sabalah. Banyak banar urang wayah ini nang disarang sakit jantung. Ujar sakit tu bapunca' masalah pamakanan (kayapa cara makan nang bujur leh... makan awan panyapit kaya Cina tu kah?), kolestrol, stress, darah tinggi n baruko' (cakada ruko' sambayang tuh). Cara manjauhakan / mangurangakan risiko sakit jantung tu ujar manteri kasihatan "melakukan senaman yang mencukupi,mengambil makanan yang sihat,mengekalkan berat badan yang ideal,jangan merokok dan menguruskan tekanan dengan baik". Kayapa ndika aiii?. Wadai urang kita nih nang nyaman sabarata'an tu kabanyakannya nang kada sihat - basantan nyior + baminyak. Bagawe pulang kada kaya urang bahari nang bakabun, basawah nang mangaluarakan paluh. Kapagawean duduk di matukah, di pagawean duduk sapanjang ari, tampat gawean ba'ekon, bulik ka rumah pulang duduk pulang sambil manereng tv + muntung kada badiam mangarutup napa wadai nang ada, kaya apa parot kada boroi & panyakit badatangan. Ulun tahaga manulis entry ni pasal 2 ekong kawan ulun nang rahat wagasan tiba-tiba rabah maninggal. Samua'an pasal sakit jantung. Nang tahanyar samalam Abang Apan ulun rabah rahat ma'unjun - kada lawas imbah tu maninggal walau sawat diatar ka sapital. Hilang lagi saekung kulaan rikit ulun. Al-Fatehah.

p/s : Ujar sasaurang "SEMUA ORANG HENDAK PANJANG UMUR,TAPI TIDAK MAHU JADI TUA"

cahh... mun ditakdirakan handak mati kada payah manunggui hudah tuha'.

Liat wayah ini barapa banyak nang mati lagi anuman?

UPAN HAUS

Kada karasa'an dua balas hari hudah kita ba'ari raya'an. Talah hudah sako' balalahan ka rumah sagala bubuhan kula'an. Hudah bagawian sunyaan kaluku' atawa lagi bacutian. Kakawanan kita nang kada dapat cuti ari raya wayah ini pang mun handak bacuti. Amun bacuti wayah hudah imbah lawas ari raya ni kada sama asanya kaya urang ba'ari raya 1 Syawal. Awan kakawanan nang kada cuti ari raya tahun ni, mudah-mudahan tahun hadap giliran andika pulang cuti - amun kada pun ari raya haji kainak hingkat jua cuti ari raya. Wayah ini gan mulai urang bulikan cuti lalu ba'ulah upan haus. Imbah ini jua tuhuklah mun kaubar mandatangi upan haus hari-hari siang malam. Alamat balamak pulang awak imbah hudah asa 'slim' sabulan puasa. Puasa anam hudah talahkah?.

UPAN HAUS

ASA HAWAI DI ARI RAYA

Jumahat - 18/9/2009 : Malam. Kami saparanakan bulik ka kampung ulun. Esoknya papagian bini ulun manggani'i uma ulun batutukar ka pasar. Imbah tu ulun ma'ambili kakak ulun awan 3 ekung anaknya. Banyak anak buah babinian ni bagus jua nyaman manulungi baharaguan di dapur. Ading ulun (Hassan) saparanakan malam ari raya hanyar sampai tumat di Karatong. Ahad - Subuh ari raya. Imbah salam ulun kada bulik ka rumah tarus ka kubur. Ari lagi tatarawan. Kadap lagi. Hudah ada 2 kaluarga sampai dahulu. Kira ulun urang katiga sampai. Saikung rahat manunggui bubuhannya - nang sakaluarga lagi hudah handak mulai batahlil awan mamasang lampu matukah hagan manarangakan pakuburan. Ulun bahahar jua mancari pakuburan paninian awan arwah ading. Inya ulun kada mambawa lampu maka manyuluh batu nesan pakuburan awan lampu handphone. Pukul 7.40 hanyar ulun bulik. Itugan gigir bini awan umaku batakun kamana tulak kada bapadah. Imbah solat ari raya kami ka rumah mintuha pulang saparanakan. Ari raya tahun ni tarasa hawai. Kada suah sapanjang ingatan ulun mun ari raya ulun hanya ba'ilang 2 bigi rumah kula'an haja. Batakun jua saurang dimapa jadi damiya'. Sabab kada cuti lawaskah, uyuh kah, kadada kanaikan kah, kadada baduit kah, kadada kula'an lagikah - asanya samua'annya kada. Jadi kanapa magun asa hawai?. Nang bujurnya kami lagi mangganangakan arwah Nan (ading ipar ulun) nang meninggalakan kami 18 ari puasa lapas. Nang rajinnya wayah ari raya kami takumpulan ading ba'ading - tahun ni hilang sa'ikung - marista banar ulun maliat 6 ikung anak-anak arwah. Tambahan pulang abah ulun garing bangat - bapa mintuha gan aur uyuh kada hingkat ditinggalakan. Jadi ulun laki bini manunggui rumah; ading ba'ading saparanakan ba'ari raya'an ka kampung. Kami bakirim anak-anak mawakilakan kami ba'ari raya. Di rumah mantuha kami laki binian manunggui bapa mintuha + batungguan urang datang ba'ilang + manggani'i bini ulun bamasak hagan tahlil arwah ading malam kainak. Parak maghrib - hanyar pa'adingan bini ulun bulikan tumat ba'ariraya'an. Talah bamasak bini ulun saurangannya. Ari raya katiga hanyar ulun saparanakan manyawatakan ba'ilang ka rumah abang Apan awan rumah Mak Ngah. Ari Salasa malam Arba kami bulikan ka Johor. Ari Arba ulun hudah bagawi.

ari raya ni ulun kadada ma'ambil gambar jadi ulun mahahar gambar dalam internet ulun manumpang ba'ungah ba'ari raya maniring gambar-gambar nih [ awan tuan ampunya gambar nang ulun copy paste minta barila'anlah ]

hujung hidup kita ka sia jua kaina wadai ni samua'an nyaman [ gan punca panyakit jua ] imbah semayang raya kampung kami ada bara'an raminya batamuan kula'an raya nang ini kada lawas lagi

Awan samua kula'an, kakawanan bubuhan banjar nang mana kada sawat batamuan ari raya nih ulun ma'ulur tangan minta barila'an kita mudah-mudahan batamuan lagi tahun hadap. SELAMAT HARI RAYA.

IMBAH 21 ARI PUASA

Lakas banar asanya masa bajalan - kada kaya bajalan lagi : asa bukah lajunya'. Kada sadar hudah tiga minggu kita puasa'an. Adakah antara andika nang hudah pacah puasa'?. Mun wayah kakanakan bahari 'pacah puasa' hajin haja'. Mun rahat mandi parit tu, menyalam disawatakan jua nginum banyu' (bujur haja' ah ujar pepatah melayu : sambil menyelam minum air). Amun kaliatan kakawanan kada mangaku pulang tuh - 'tanginumlah' lakonnya'. Tanginum tu umpamanya 'terminum'lah - tak sengaja. Jadi amun kada singhaja tu kada batal puasa. Amun bulikan sakulah pang bajalan batis sabatu labih jauhnya', ari pang panas ; malalui rumah urang sawat ma'ambil banyu dalam guri urang hagan nginum. Amun tahaga kanas anum gan jadi jua dihantus hagan mahilangakan haus. Sampai ka rumah balakon kaya panat banar puasa. Urang babuka sasamaan nai jua basila mahadap pabuka'an. Uma bapa kada tahu inya kada puasa. Mun sapa'adingan tahu, bakidip mata haja. Biar pacah di parut jangan pacah di mulut eehh 'muntung'. Gitu carita puasa wayah bahari lagi kakanakan. Tapi wayah itu handak manunggui sabulan talah puasa asa lawas banar. Kada kaya wayah ini satumat haja hudah handak ari raya. HARI RAYA - hagan kakanakan haja ba'ungah-ungah.

haningnya sahur / subuh wayah ini urang babini kulir ma'ulah wadai hagan babuka' sarabanya ditukar haja' di bazar Ramadhan raminya babuka puasa khusu'nya tarawih

KAMATIAN

اَللَّهُمَّ اجْعَلْ قَبْرَهُ رَوْضَةً مِنْ رِيَاضِ الْجَنَّةِ , اَللَّهُمَّ أَنْتَ رَبُّهُ وَأَنْتَ خَلَقْتَهُ وَأَنْتَ هَدَيْتَهُ لِلإِْسْلاَمِ وَأَنْتَ قَبَضْتَ رُوْحَهُ وَأَنْتَ أَعْلَمُ بِسِرِّهِ وَعَلاَنِيَتِهِ وَقَدْ جِئْنَاكَ شُفَعَاءَ لَهُ وَِلاِخْوَانِنَا الَّذِيْنَ سَبَقُوْنَا بِالإِيْمَانِ وَلاَ تَجْعَلْ فِيْ قُلُوْبِنَا غِلاًّ لِلَّذِيْنَ آمَنُوْا رَبَّنَا إِنَّك رَؤُوْفٌ رَّحِيْم , وَصَلَّى اللهُ عَلَى سَيِّدِنَا مُحَمَّدٍ وَعَلَى آلِهِ وَصَحْبِهِ أَجْمَعِيْنَ , سُبْحَانَكَ رَبِّ الْعِزَّةِ عَمَّا يَصِفُوْنَ وَسَلاَمٌ عَلَى الْمُرْسَلِيْنَ وَالْحَمْدُ ِللهِ رَبِّ الْعَالَمِيْنَ Awal subuh - 4.04 am / 18 Ramadhan

talipon babunyi. Bini ulun manyahuti. Jamil bapadah Nan (ading ipar ulun) nazak di hospital Batu Pahat. Doktor rahat ba'ulah ikhtiar panghabisan. Balum lagi pukul 6.00 am Izun pulang manalipun. Nan dah meninggal. Ulun manalipun boss minta EL. Bulikan kami laki bini. Sampai ka rumah Nan jenazah balum sampai. Samua diurusakan di Hospital. Labihkurang pukul 9.30 am jenazah sampai. Ana (balu allahyarham) saurangan ma'iringi jenazah dalam van. Mangganang arwah - hanyar Sabtu lapas kami batamuan di rumahnya. Arwah masa itu rahat gagaringan awak tapi bagagah jua' ba'ulahan sarabanya hagan dijual bulan puasa nih. Hanyar dua hari lapas inya' manalipun bini ulun suruh manampah kek strawberry awan kek lapis ari raya awan inya'. Mangganang allahyarham - ading ipar nang kaya ading saurang. 13 tahun hidup bagantung awan dialysis. Walau sakit sapanjangan kada suah mengadu kasusahan awan sasiapa. Suah ulun manangis papagian ari raya marista' panyakit arwah. Pada biras ulun Ana awan anam ekong anak-anak - basabar awan dugaan Allah. Al-Fatehah hagan arwah.

MA'ILANGI KUITAN

Minggu ni' taparaung abah awan bapa mantuha' ulun garingan. Bini ulun bulik dahulu manjagai bapanya' - naik bas bulik ka Batu Pahat. Ulun lagi bagawian maka kada hingkat bulik ba'imbai. Tinggal ulun awan anak bongsu ulun awan anak nang babini di rumah. Ada anak babini sa'ikung nih hingkat jualah diharap bamasak hagan babuka puasa awan sahur. Pa'isukan arinya ulun dapat cuti - guringan hulu' imbah sahur / subuh ; imbah tu bulikan kami 3 baranak labihkurang pukul 9 pagi. Kada ikut labuhraya, ikut jalan lawas - maharan duit tol. Masa limpua' Spg. Ranggam sawat kami bamandak di Taman Seri Mewah 3 maliati rumah kami nang rahat di'ulah. Parak handak tuntung sudah. Imbah tu ma'atar anak ulun ka rumah padatuan sabalah umanya'. Bapa mantuha' ulun ni parak 90 tahun umurnya' hudah, maliat kami datangan bagagah hidin bapuat tumat tampat paguringan handak batamuan anak cucu'. Imbah barihat satumat ulun bulik ka rumah uma bapa ulun saurangan - pacangannya esuk handak mambawa abah ka hospital 'check up'.

Esuknya ulun awan uma' ulun mambawa abah ka hospital - ma'ulah ultra sound awan pariksa darah. Kaputusan hanyar hingkat diambil esok atawa ari Salasa hadap. Kada kawa ulun manunggui. Minta tulungi awan ading ipar ulun (Nan) ma'ambilakan result abahku' esok.

pagana'an kami saparanakan PERSIARAN TANJUNG

parak handak tuntung hudah

pagana'an kami di kampung

..di sia' kami sapa'adingan diganalakan

pagana'an mintuha' ulun

suah ulun bagana' satumat di wad hospital nih

Tuah lahir di sini

KONVO ITA

24 Sya'aban 1430H / 15 Ogos 2009M - Sabtu.

Malam tadi sampai ka kampung. Bulikan awan bini n Tuah. Solat maghrib / isya' di Masjid Jame' Ayer Hitam. Sampai di rumah uma bapa ulun balum guringan lagi menunggui kami. Sawat lagi bapandiran sambil maliat tv sabalum guring. Esoknya papagian bini ulun mambawa uma ka pasar batukaran kaparluan dapur. Ulun di rumah manggunting rambut bapa ulun. Imbah tu mambawa uma ulun malawat mak ngah (kakanya uma ulun) di Hospital Batu Pahat. Inya malawat kada waktu malawat ya'am ( 9.30 am ) maka kana masuk bagilir pang. Itu gan bahimat maminta kasian awan pak guard n mak guard nang bagawi' tuh - cah straight bangat ya'am inya' 2 ekong nih. Imbah tuntung samua'an gawian ulun awan bini ulun n Tuah ka sakulah Ita. Ita arini ada konvo darjah khas - inya' dapat pangkat 1. Masa saparu' jalan ka sakulahan Ita ulun hudah asa kada nyaman awak : kapala minik tapi bagamat jua' mamandu matukah ka sakulahan Ita. Sampai di sakulahan Ita kami manunggui inya satumat bakamas. Imbah tu kami saparanakan ke tampat konvo di Dewan Jubli Intan Pontian. Masa tu hingkat lagi ulun man'drive' - sampai haja' parak tampat konvo kami bamandakan. Ulun barabah dalam matukah, bini ulun, Tuah awan Ita makanan di kadai makan parak awan masigid. Kada lawas Tuah datang ma'atari nasi bungkus. Kada lawas imbah tu' azan Zohor kadangaran - kami ka masigitan. Rami orang di masigid tuh, banyak nang datang jauh karna hadir anak konvo. Imbah sumbayangan kami ka tampat konvo. Urang hudah malaut banyaknya'. Ulun bagagah jualah ma'umpati anak bini ulun masuk ke dewan. Adalah satangah jam ulun tapaksa bulik barabah di matukah pulang - minik banar kapala. Talah majlis konvo kami ma'atar Ita bulik ka sakulahannya. Kasian jua ulun awan Ita karna ulun kada dapat sampai talah bagana' dalam dewan maliat inya' ma'ambil scroll.

SEKOLAH ITA

Ajib pun dulu sekolah kat sini

Ita dgn mak dia

mak mana yang tak bangga dengan

kejayaan anak-anak?

satu-satunya puteri kami

NOR MASYITAH mak yang sentiasa mendoakan anak-anaknya

Ita dengan kawan dia

MAJLIS KONVO bakal ustaz / ustazah

SEMINAR CO-DEPENDENCY Venue : Hotel Seri Malaysia, J.Bahru Date : 31/7 - 1/8/2009 Lagi sakali hujung minggu kana bagawi. Kali ini ulun awan bubuhan ulun ma'ulah seminar pulang hagan kula'an, anak bini', uma bapa, pa'adingan atawa sasapa ai nang taparikitan awan "client" kami nang di dalam nih. Ngaleh banar handak mamujuk minta datangan. Samua ditanggung - free gitu!!!. Banyak nang pamula'annya manyanggupi datang tapi last minute hampeehhh...itupun mun kada ditalipun haram kada mau pabadah. Itukah sikap kaluarga #$%%!! ? kada kalukuk...memang banyak halangannya handak datang - nang status "ibu tunggal" anak-anak siapa handak manjaga' akan, handak tulak jua' walaupun makan awan pagana'aan di bari'i tapi tambang bas / taxi kada duit sa'urang ju

Apapun tarima kasih pada 28 kaluarga ( itu gan mahahar minta kakawanan mancari' akan - pacangan asalnya 30 kaluarga sanggup datang - paling jauh datang tumat di KL. Awan Dr. Siva & the team tumat S'pore - tarima kasih jua karna manggani'i kami manjalanakan program nih. Satu nang bagus hotel nih wifinya' unsecured - puas anak buah ma'udak laptop ulun sampai imbah bulik dua hari imbah tuh..kada hingkat dipakai lagi...kana format pulang...haiii...kakanakan..macal sarabanya' Eh..asa rajin ulun minggu ni up date blog. Ada tabaca di blog ulun sa'ekong anak buah ulun (follower) pengalaman masa ulun diminta ulun bacarita Japun. Ayuha' imbah ini mun ada lagi gambar-gambar lawas di sana, ulun mangaradau pulang.

SEMINAR CO-DEPENDENCY