TAGANANG WAYAH BAHARI

Arini 1 Mei...hari pakarja (dahulu dihiyau urang Hari Buruh). Hari urang nang bagawi makan gajih awan majikan kerajaan / swasta cuti-kada bagawi. Amun bagawi jua dibayar 3 kali gajih. Itu urang nang bagawi ada majikan, amun nang bagawi saurang atawa jadi kuli kadada mandapat cuti hari pakarja - ada gawian ada gajih amun kada bagawi kadada duit. Mambandingakan kahidupan bahari awan wayahini kaya langit awan bumi. Taganang masa kakanakan lagi, wayahitu kada tahu lagi kasusahan kahidupan - tahu ba'ungah-ungah haja'. Uma bapa bagawi bahimat mancari duit hagan mangganalakan anak. Papagian hudah tulak ka kabun manureh gatah - amun kabun saurang kada apa jua' ni kabun urang jadi pandapatannya bagi dua. Haraga gatah pulang masaitu murah, amun sabulan manureh handak dapat RM200 gan ngaleh. Hagan mancukupakan bapa (abah ku') patang bagawi ma'ambil upah malubangi tanaman gatah 'planting' awan kalapa sawit. Amun musim ba'ah lagi ngaleh kahidupan. Ari aur hujan, gatah kada bisa ditureh jadi kadada baduit. Hagan makan bahutang di kadai tokeh China. Amun makan bubur ka atawa makan hubi kayu wayah ba'ah ni biasalah. Nang bagus sa'ikit masa ba'ah ni iwak banyak. Kami sapa'adingan lalaki rahat manajur iwak haruan awan iwak kali'. Mun ma'unjun iwak papuyu gan banyak ba'ulih. Ba'ah biasanya lawas jua' - makan satangah bulan hanyar pandit banyuk. Halaman rumah banyuk sampai kalintuhut atawa mun ba'ah ganal sampai ka lantai rumah gan ada. Basampan hajak amun handak ka mana. Sapa'ingatan ulun suah 2 kali ba'ah ganal masa ari raya. Kada papanya'ai ari raya-handak tulak sumbahiyang raya gan basampan. Amun musim basawah uma bapa lagi rahat bagawi pagi patang. Pagi manureh patang basawah atawa mun ari hujan basawah pang saharian. Ulun wayahitu ba'umur 9 tahun hudah bisa manggani'i kuitan manureh awan basawah. Amun ma'ingatakan masa sakulah ulun awan ading ba'ading abah uma haja' nang kuat manyuruh. Mun panenean awan kula'an kadada nang manggalakakan. Napang sapupu-sapupu ulun inya' habis darajah 6 sakulah ampeh - lalu bagawi di estet makanya baduit,apabila batamuan panenean ma'unjuk duit - kami kada kawa mambari'i duit - lagi sakulah ya'am. Inyak umur 17 kah 18 kah hudah kawinan - kami sapa'adingan lagi sakulah. Amun kada uma bapa nang basabar dan tarus manyuruh kami sakulah mau ampeh haja' sakulah - napatia sakulah dibari'i duit 20 sen sahari - tumat sakulah pagi sampai sakulah agama patang / pukul 6 pagi hudah bajalan batis kasakulahan ada sabatu' jauhnya patang pukul 4 - 5 hanyar sampai karumah. Amun ari hujan kana bamandak di mana-mana lagi lambat bulek. Amun lambat bulek disariki abah inyak takutan ulun balalah kamana-mana. Baju hagan ari raya gan putih nyaman hingkat dipakai sakulah agama. Kasutnya' kasut plastik putih jadi basah kah karingkah kadada masalah. Imbah hudah ganal rahat sakulah tingkatan anam gan ulun lagi bagawi mancari duit saurang. Ulun sakulah sabalah patang , sabalah pagi imbah ma'umpati uma' ka kabun panurehan ( bapa wayahitu bagawi di singapura ) ulun ka kabun saurang manureh jua. Sahari dapat RM2 -3 cukup banar hagan tambang bas ka sakulahan awan babalanja. Masa manunggui kaputusan SPM kah STPM kah ulun kada bagana' di rumah kada. Tulak bagawi awan kakawanan mancari duit ka mana-mana. Macam-macam gawean nang suah diulah - bagawi kontrak suah, bagawi jadi Pak Guard suah, jadi salesman suah, jadi karani suah...jadi panyuntan haja nang kada suah!. Jadi pabila ulun ma'ingatakan samua'an kahidupan bahari babanding wayahini sajuta syukur pang nang hingkat diucapakan awan Allah SWT nang adil marancang dan manantuakan kahidupan awan rajaki hambanya. Kada suah tapikir ulun sapa'adingan bisa hidup kaya urang lain. Mun bahari sabuah beskal abah tu hajak nang baganti-ganti kami bamain waktu kada dipakai abah bagawi - sampai handak rakai kami ulah. Amun cuti sakulah imbah manulungi gawean uma bapa malastik burung di padang tagah haja gawean kami. Makan tangahari gan dihiyau hanyar bulik. Inyak kakanakan ya'am kada nya tahu kasusahan uma bapa bacari. Masa ulun bulik kampung 2 hari lapas, ulun bajalan maliati pakabunan uma bapa. Barkat sabar / jimat caramat uma bapa hingkat inya' ba'ulih kabun saurang. Habis tanah sawah awan kabun gatahnya ditanami kalapa sawit - tapi diupahakan awan urang Indon mangawi'akan. Wayahini kalupang kada sugih tapi hingkat jualah hidup kaya urang. Kada sangka uma bapa ulun hudah ampat kali ka makah, ta'umpat jua ulun awan bini ulun - amun mangganang masa bahari handak makan gan ngalih. Tarima kasih pada uma bapa nang mangganalakan kami sapa'adingan, tarima kasih jua' awan arwah datu awan panenean nang malajari mangaji malam awan lampu sumbu minya' tanah ; Al-Fatehah. Satinggi kasyukuran kami kahadrat Allah SWT nang mangurniakan kahidupan nang labih baik babanding masa bahari. Amin.