KAGANANGAN WAYAH BAGANA DI JAPUN

SONG :KITA NO TABIBITO [LYRIC]

たどりついたら　岬のはずれ

Tadori tsuitara misaki no hazure

赤い灯が点く　ぽつりとひとつ

Akai hi ga tsuku potsurito hitotsu

いまでもあなたを　待ってると

Imademo anatawo matteruto

いとしい　おまえの　呼ぶ声が

Itoshii omaeno yobukoe ga

俺の背中で　潮風(かぜ)になる

Oreno senakade kaze ni naru

夜の釧路は　雨になるだろう

Yoruno Kushiro wa ameni narudarou

ふるい酒場で　噂をきいた

Furui sakabade uwasawo kiita

窓のむこうは　木枯まじり

Madono mukouwa kogarashi majiri

半年まえまで　居たという

Hantoshi maemade itato iu

泣きぐせ　酒ぐせ　泪ぐせ

Nakiguse sakeguse namida guse

どこへ行ったか　細い影

Dokoe ittaka hosoi kage

夜の函館　霧がつらすぎる

Yoruno Hakodate tsuyuga tsurasugiru

空でちぎれる　あの汽笛さえ

Sorade chigireru ano kiteki sae

泣いて別れる　さい果て港

Naite wakareru saihate　minato

いちどはこの手で　抱きしめて

Ichidowa konotede dakishimete

泣かせてやりたい　思いきり

Nakasete yaritai omoikiri

消えぬ面影　たずねびと

Kienu omokage tazunebito

夜の小樽は　雪が肩に舞う

Yoruno Otaru wa yuki ga katani mau

BLOG VS FB

Bujur jah artikel di subalah nih. Bahana facebook karancakan banyak blogger wayahini pakai gear randah. Nasib baik kada pakai gear gostan he he he.. ta'umpat jua ulun. Nasib baik ulun manulis hagan u'ulahan tangan nang kada pati banyak bagawean. Amun blogger tegar nang manulis hagan mancari makan, dasar kada makan anak bini. Anak ulun si Emon ada ma'ulah entry di FBnya - jah amun urang mahabisakan masa labih 3 jam sahari di FB sudah dikira addict. Uma'ai - amun kaya' itu banyak urang nang hudah batarap addict tuh. Tapi kada ta'umpat ulun lah kaluku'. Ulun walau ada manjanguk FB tapi kadalah sampai talalu lawas sampai 3 jam. Tapi pabila manereng blog ulun uma'ai. Sapanjang tahun 2009 ulun hanya ada 50 posting haja'. Hitung panjang 4 sabulan. Tahun 2010 ? hanyar sa'uting utuh awan diyang ngai...tu gan posting Januari - bulan Februari : kadida'...ni manyawatakan hagan posting Februari 2010. Esok masuk bulan Mac ganap satahun blog ulun ... asanya matlamat ulun handak malandapakan lagi basa ibunda ulun kada patian tacapai. Kada banyak asanya paningkatan basa ibunda ulun. Sabab utamanya pasal ngaleh banar tatamu urang banjar nang mau bapandiran guna basa banjar. Xsen kononnya. Tapi mun bapandir tu bacampur-campur basa urang putih kada supan pulang, malah asa bangga kalo'. Tapi ca dibawa'i bapandir basa urang putih sapanuhnya' kada mau pulang. Dilema ulun. Dalam hati handak banar ulun lanteh bapandir awan manulis basa ibunda neh.. handak banar ulun amun hingkat manulis kaya artikel di bawah nih...

“Kami amun bulikan karumah mintuha matan kalambisikan pang saparanakan,napang mun ayah nya kakanakan nih aur paripisan sapawargaan bapandir Banjar,cakada pati mangarti” ujar si Faridah jawa balaki banjar pamuntungan lantih kaya burung sarindit hudah batahunan aii bagana di Gombak ,salang lima buah rumah jua halatnya awan rumah si Nanang Sukri,kada jauh banar.Sabuting parangai si Faridah jawa ba anak talo nia nang asa muyak di dangar,amun rahatan bapandiran sasamaan bubuhan bibinian katuju banar manbualakan kaharatan laki surang haja,paribasa nya amun bisa manguiri kisah nang di dalam kalambu laginai di padahakan nya. Hadi ,banjar B.P bagawi saurang,ba bengkel mamparigal matukah di AU 3,pangawak putih rurupaan Cina.Pakaian amun tulak/ mantuk bagawi bingking tantan,bilang hingkat mandaingi bubuhan nang bagawi di opis.Sakali cakada suah talihat sidin bapakai pakaian Pomen nang bakuncalak ninto.Walau ba pomen ,tagal jarigi tangan magunai kincir, napang mun bilang bagabal sarung tangan di sangue nang bini.Bah sayang nya si Faridah tutih ka laki asa kada hingkat ai mamadahakan bilang kaya mantating cawan gatah wayah baputik di pamotongan.Cuti kada bagawi, rahatan barihat di rumah sarabanya pang di surung di sintaki ilah Raja kalilimput,dasar ba untung pang di ikam Hadi ai taulihi bini kaya si Faridah nia!! Babaya mandangar haja marga si Hadi tutih bubuhan banjar………………… “Umak nya……..malam nih iringi diako mailangi rumah si Faridah tuh lah……….kada napa apa ah….katuju cagar bapinanduan awan nang laki si Hadi tuh banarai nih,kaluko kawa mangacak pandir…….malaran”.Kuya si Nanang Sukri nang hudah salawasan ,kada magan ta dangar banjar,laluan ai mangahing kapingin bapinanduan ,dasar kandal sumangat ka banjaran hidin……..napa itu aii!! “Saya ni yang sebetul nya dah ta berapa pandai lagi cakap banjar” ujar si Hadi kutika di ilangi tatambaian bapinanduan awan Nanang Sukri.Tahu haja lah bubuhan ai,mun si Nanang nia tatamu banjar matan surah banjar tutok tantan. “Umai dinto ah tih………kaya apa amun bulik karumah kawitan di BP dangsanak,langsung langlam ai banjar di ikam lah?”.Surung hidin kanu si Hadi. “Memang dah berataan cakap malayu ,banjar dah kami lupakan terus”.Sahut si Hadi kanu Nanang Sukri. Si Faridah jawa wan bini Nanang Sukri ba cangangan papasing nya pabila mandangar kuyaan si Hadi kalakon tutih. Si Nanang Sukri nang hudah tadahulu mamakan wadi tia labih pada magarti angkara kuliman di ikam tuh si Hadi aii.Marga supanan basurah banjar balajuran kada pati bisa lagi ha …..ujar! Sawat talah sa cawan kopi di rumah si Faridah tasambat. “Ayuha mun dinto,kami pinta ba isur dahulu nah dangsanakai……..Barilaan kita lah” jar si Nanang sambil manyurung salam. “Apa yang berilaan nih…..tak paham lah makna nya”.Sahut si Hadi ilah manyindir ka hidin. Babaya sampai haja ka rumah……………..Dabuukkkkkk………lawang nang kada bapasal jadi sandaran panumbok si Nanang Sukri. “Haiii…….garigitan nya ako aii……….sanonoh tatamu banjar di Gombak nia,pinda kada hakun mangaku banjar …….wajib di hukumakan jua sako!!”. Hingkau hidin ka sangitan. Bini hidin mandam kada sing bunyian,tahu banar pang hudah parangai,duga banjar sarana di guloki di padahi kada mangaruan, mampiulah kana gusari hidin banarai. Lima bulan waktu balalu,hingga nya sakali tutih pang Nanang Sukri bapandir wan si Hadi.Tatamu gin bilang basulisih di jalan ,tuh gin sacara kabujuran banar haja. “Kami cagar handak pindah bulikan ka BP ba ampat baranak kak ai,napa juaha lagi nang di hadang di sia……..Hadi hudah kada jujur lawan diako…..damini rahatan basumbangan wan bini urang…..labih pada bacicintanan……..kami hanyaram imb ah bakalahi laki binian……..Hadi mahalau aku……kakak aii!!’. Kuya si Faridah sambil babarubuian banyu mata bapadah kanu bini si Nanang Sukri. “Umaiyallah……matan kada di sangka si Hadi laki kasayangan di ikam tuh baulah parangai kada sanonoh damia……mambari supan……cakada manganang langsung kanu nang batiga ba ading nang magun karawicikan nih kapupurunan,pahadangan esuk bamalam ha di sia hulu Faridah aii”. Sahut bini si Nanang Sukri ka kasianan. Dua bulan masa balalu………….Hadi wan Faridah rahatan barambangan………Habar hanyar nang hampai ka talinga Nanang Sukri.Hadi tangah basimpai kapala di Wad Hospital Ganal,KL marga imbah di pupuhi si laki bibinian nang ba can wan si Hadi tutih. “Napa am ayah nya……..dika kada mailangi ah ka Hadi nang rahatan uyuh di Sapitar tuh”.Takunan bini Nanang Sukri kanu hidin. “Cah……cakada kaparluan di ako mailangi banjar murtad kadamia……….hija akan haja satatayuh nya…..tewas wani mampiulah…..tantu pang wani jua mananggung……..hapus muha!!!”.

Uma' dangsanak ai. Ulun copy paste artikel saekung kula'an kita. Barila'anlah ulun awan dangsanak tuh......

HADIAH

Selamat Tahun Hanyar...keh keh keh. Bujur juakah basa tuh?. Tahun masihi 2010 datang hudah. Jangan kalumpanan pulang nang tahun Hijri hudah 17 Muharam 1431. Apa jua - umur kita batambah satahun ; hari kamatian kita pulang tambah baparak. Ulun kada handak basurah pasal tahun hanyar. Banyak urang hudah nang tahalulung tiap awal tahun. Ba'ajam itu, ba'ajam inih. Ada nang handak bamandak ma'isap rokok. Ada nang handak itu, ada nang handak ini. Tu pang ucapan ajam awal tahun nang 'koman' . Imbah sabulan dua kalumpanan nai. Tahun hadapan diulang pulang. Nah...ulun pulang ta'umpat babuat menyambat jua' pasal tahun hanyar.

Entry ulun kali nih - HADIAH. Kada pasti ulun dalam basa banjar kaya apa handak manyambat. Bulan lapas ulun ada mandapat pambarian hadiah istemewa tumat kula'an nang bulik haji'. Barang pambariannya tu biasa-biasa haja' tapi "sentimental value"nya nang mahal. Inya hadiah tu dibari'i oleh kula'an rapat. Tiap tahun nai ulun ba'ulih hadiah tumat kakawanan nang bulik haji' tapi tahun ini asa lain sa'ikit. Pambarian tumat dangsanak nang rikit manjadi akan pambarian tu asa baharga banar. Apa lagi hadiah tuh ditukarakan khas hagan kita.

Amun kita bajiarah urang bulikan haji' - napa nang hajan di ulah urang, napa nang kita dibari'i?. Nang rahat hajinnya' dibari'i marasai tamar,manisan,atawa dihadiahakan tasbih kah kupiah kah....wangian kah...atawa amun bakula'an mau asa batuah dibari'i nginum banyu zam-zam. Ulun ba'ulih samu'an tuh. Tapi nang ma'ulah ulun asa "istemewa" karna hadiah pambarian tu ditukarakan khas hagan ulun. Pambarian urang bulik haji' - manambahakan karikitan kula'an. Pambarian urang bulik haji' hagan kita manggambarakan kita santiasa diganang. Bulikan urang haji' pulang marungkai karinduan anak-anak, kaluarga' awan sunya'an kula'an.

BAPALA'...

Salipar. Salipar japun. Salipar hagan ka jamban. Salipar hagan balalah. Wayah ini urang mamakai salipar Japun ni ka mana-mana' ai. Suah ulun batamuan urang basalipar japun ju'uk-ju'uk di KLIA. Asa'an ulun inya' gagawaian haja' balalah di KLIA. - kada lawas imbah tu' tatamu pulang di balai berlepas - imbah tu taduduk parak pulang dalam kapal tarabang.

NAH..han tia' urang basalipar Japun gan kawa naik kapal tarabang. Kada urang sugih haja' hingkat naik kapal tarabang. Basalipar Japun kada jua jadi kita pinandu inya' urang susah.

Napatia entry ulun kalini maka salipar? Bapala' banar salipar nih..Minggu lapas ulun asa garigitan banar. Kada garigitan awan sasiapa kada'am. Garigitan saurang. Mana kada garigitan - ari Sanayan mulai bagawi'. Babaya' masuk ka pajabat saurang kunyuk-kunyuk mancari'i kunci laci meja gawian. Habis digulagai paket salawar awan kampil gawian kadada' jua tatamu kunci tuhh....

Labih ngalu lagi kapala sarungkuian kunci tu hilang tarait jua awan kunci pati wasi pajabat. Asa'an tatinggal di rumah kalu'. Bulik ka rumah satumat - habis digulagai sagala macam kampil awan paket salawar. Kadada' jua . Bulik pulang ka pajabat. Bapaluhan mamikirakan - ma'ingatakan di mana lakunnya diandak kunci tuh?. Batakun jua awan kakawanan mun ada tatamu - kadada' jua. Handap hudah pikiran ulun mahiyau kakanakan mamacahakan kunci laci meja bagawi' ulun. Talah sa'uteng problem - nih handak mambuka pati wasi ni kaya apa pulang nih?.. masalah nih amun dipacah jua'. Amun tapaksa kana dipacah jua'ai - tapikir pulang mun mahiyau tukang kunci ..... Nasiblah amun admin ada baduit hagan mambayar tukang kunci, salamat duit ulun - amun kada' duit ulun saurang tarabang.

Bagamat ulun manalipun admin (CT Zetun) mangadu hal.....asa handak tapacul salawar ulun kabila inya' bapadah di opisnya' ada sarangkai kunci diatar urang. Ulun batakun "rantai kunci tu selipar tulis Langkawi...?". "Iye...." ujar CT Zetun.

Dasar bapalak banar. Inya' hudah tuhak ya'am. Rahat banar kalumpanan. Receptor otak banyak nang hudah mati kada diganti pugak kalukuk. Adakah bajualan di kadai RM2.00. Mun ada hajin ulun manukar banyak nyaman diulah spare-part.

BULAN HAJI'

"لَبَّيْكَ اللّهُمَّ لَبَّيْكَ، لَبَّيْكَ لاَشَرِيْكَ لَكَ لَبَّيْكَ، إِنَّ الْحَمْدَ وَالنِّعْمَةَ لَكَ وَالْمُلْكَ، لاَشَرَيْكَ لَكَ."

Kada karasa'an kita, kula'an nang tulakan ka Makah handak bulek hudah. Rahat gigir kita ba'ari raya haji awan bakorban di siak bubuhan haji kada pati bisa ba'ari raya kaya kita. Sa'ingat pengalaman ulun wayah ulun ka Makah awan bini awan bapa ulun dahulu' asa kada' ari raya. Bubuhan nang nafar awal bulik ka Makah imbah malontar kalo marasa suasana ari raya. Kami bilang bapanat ulang alik tumat tampat kadiaman ka jamrah. Khemah kami pulang jauh. Kami bajalan batis pukul 2.00 pagi. Mau pang 3 batu sako'. Ulun pulang aur manjaga'i bapa ulun nang kada pati wagas wayah itu. Bini ulun pulang rajakinya kana manggani'i saikung urang tuha babini nang ka Makah manumpang muhrim anak kamanakannya. Malangnya' kabila hampai ka Makah anak kamanakannya aur bakapit badua laki bini kalumpanan sako handak manjaga'i urang tuha' tuh. Wayah itu dibanding wayah ini kamudahannya gan jauh banar. Dahulu amun di Makah tuh nang lalaki diandak 10 ikung jama'ah sabilik. Tiap urang dibari'i tilam nipis. Kadida tampat guringan (katil) di lantai pang. Di Madinah hanyar marasa bagana' di hotel. Tu gan kaya sardin. Syukurnya' masigit haram kada pati jauh awan kadiaman kami. Amun kadangaran azan masuk waktu sawat lagi bukah ka masigit hagan bajama'ah. Di Madinah gan sama ai jua'. Amun diganang-ganang marista jua asa handak tulak lagi ka Makah. Tiap kali kakawanan handak ka Makah asa handak jua'. Tiap kali mandangar kabar urang hudah handak bulikan haji asa kaya rugi kada tulak. Minggu hadap nih Abang Usop & Kak Timah awan Azmin & Dillah insyallah bulikan - mudahan pakulihannya haji mabrur. Awan kakawanan / kulaan lagi anum, lagi wagasan lakasi tulak. Kada payah manunggui "seru". Amun mandangar haja carita urang bahaji kada sama awan saurang tulak. p/s : Ada badua 'somebody' nang pacangan minta ulun manggani'i inya' ka Makah ma'ulah umrah. Ni amun katahuan (????) mau disambatnya 'sponsor a.k.a rasuah'. Mau ulun kada jadi tulak kaya TGNA nang kada jadi bahaji tahun nih pasal dikuyak urang.