AWAK UYUH - GAGARINGAN

Asa lawas banar kada babuat ka siak. Tu 'am urang ba blog ikam handak jua ba blog tapi kada pati kaubar. Aur bagawi hajak. Kada pati lawas baganak di rumah aur ka sana ka sini bagawi. Amun aur bagawi hajak awak gan panat kadada masa handak meliati blog saurang. Amun ma'itihi internet gan hanya untuk mancari sumber maklumat banarai. Sibuk, panat, kada kaubar itu nang sudah tantu sababnya tapi satu sabab lagi parak jua' 3 minggu ulun uyuh. Bamula 17/5/09 ulun diarah manggantiakan boss ulun ka Akademi Akauntan Negara (AAN - bandar enstek Nilai) ke seminar accountability index sampai 19/5/09. Handak tulak hajak hudah ada masalah. Kadada driver ma'atar. Di tampat pagawian ulun matukah banyak tapi driver 3 ekong haja' ada. Kabatulan samu'an driver kami out-station. Jadi kana mambawa matukah sauranglah jawabnya. Ulun ni hudah lawas kada pati kawa mamandu lawas. Paling lawas sejam sudah manguap (kaya' harimau...hehehehe..). Salalu amun bulik kampung nang pajalanannya' kada sampai 2 jam gan bini ulun nang mamandu (ulun guring pang - nasib baik bini ulun bisa mamandu walaupun kada bagawi kaya' babinian ber'kerjaya' lain ). Jadi ulun tulak tumat rumah ulun di JB labihkurang pukul 11.00 pagi, imbah mancari sa'ikit jajanan dan kaparluan di Maiden, makan awan ma'isi minyak - gamat-gamat ulun memandu. Amun di labuhraya tu gamat kada gamat, amun kada maniring speedo meter kada sadar 130 kmh hudah lajunya- uma' ni mun kana saman kada magan claim mileage ulun. Iya matukah jarang dipakai ya'am Waja 1.6 ulun ni bini ulun pang mamakai hari-hari hagan ke pakan awan ma'ilangi anak di asrama. Ulun bagawi mamakai matukah lawas haja' karana jalan ka tampat pagawian tuh rahat diulah projek mahu 2 tahun kaluluk hanyar tuntung - tu nang matukah bakuncalak awan tanah lumpur amun hari hujan. Rahat mamandu biniku manalipun minta ulun singgah di Simpang Ranggam ma'ambil resit bayaran rumah, nasib baik balum talapas lagi tol Simpang Ranggam. Imbah itu ulun kaluar tol Air Hitam tarus mamandu ke utara gamat-gamat sambil makan jajan apa nang ada awan banyu 'O' botol kurang manis?. Ulun bamandak di R&R Ayer Keroh labihkurang pukul 3.30 - sambayang jama' zohor / asar awan barabah marihatakan awak. Bini ulun manilpun lagi "sudah sampaikah?" inya takajut pabila ulun mamadahakan hanyar sampai di Ayer Keroh. Hanyar ta'ingat waktu mendaftar kada lewat jam 5.00 patang - tampat nang dituju kada tahu lagi. Lakas-lakas ulun manyambung jalan. Maliwati Simpang Ampat ulun tapikir pulang handak ikut tol Saramban kah, Nilai kah?. Iya' am salalu mun diatar driver tahu-tahu sampai - ini tulak saurangan padan muha'. Manganangakan tampat nang ulun handak tulak tu di Nilai ulun ambil kaputusan kaluar ikut tol Nilai. Masa mambayar tol tol jurutol tu mambari panduan jalan ka AAN. Tapi bukan sanang mancari tampat tuh - tasasat jua ulun sakali. Tampat tu partama kali ulun tulak saurangan ( parnah ka USIM tapi diatar urang jadi kada pati ingat - talalui jua sakulahan 'anak abah si Emon - Kolej Nilai ) tapi AAN tu lagi jauh ka' atas. Masa tasasat tu batakun awan urang banyak nang kada tahu' bandar enstek - panyudahnya ada saekong Cina nang tahu lalu ma'ulahakan plan, akhirnya pukul 5.45 hanyar ulun sampai ke AAN. Imbah mandaftar ulun barihat di bilik 310 - sudah saurangan jadi maliati tv haja gawian. Masa makan malam hanyar batamuan awan pasarta-pasarta lain. Imbah makan bulik ka bilik - bapandir talipon awan bini ulun imbah tu tarus guring. Esok harinya mulai awak ulun asa gagaringan. Wahin awan hidung bahingusan awan kapala barat tapi digagahakan jua umpat basaminar. Pasartanya pangarah-pangarah nagari,pangarah-pangarah bahagian,komandan samu'an gred 48 - 54. Tapi mareka kaya' urang biasa jua' amun hadir ka seminar - ada nang taguring masa sesi, ada nang ponteng, ada nang ranai burinik, ada nang aktif batakun macam-macam [ amun awan urang bawahan maka'am kaya' inya' hajak nang bujur ... wakakakaka...). Alhamdulillah sampai jua hari akhir 19hb, majlis panutup dan panyampaian sijil oleh TKP(P) n Pengarah AAN. Imbah haja' sudah majlis labikhkurang pukul 5.15 tarus haja' ulun mamandu bulik, kali ini ikut Saramban (ujar urang labih parak) nekad haja' mamandu saurangan karna hari parak kadap hudah alhamdulillah sampai ka Saramban imbah labihkurang 40 minit. Masa mamandu tu garing ulun asa batambah - risau ulun takutan kalu kada hingkat sampai ka rumah ( ma'ambil panadol kalu sudah barapa bigi - tapi kada surut garingnya) Ulun singgah di Pagoh makan awan solat jama' maghrib / isya'. Imbah tu mayambung parjalanan bulik ke rumah. Labihkurang pukul 9.30 malam ulun salamat sampai di rumah. Minta bini ulun manukarakan ubat karna rasanya garing ulun kada baik lagi. Esoknya imbah bini ulun ma'ambil anak bulik di asrama - ulun di bawa bini awan anak ulun ka klinik. Kana' inject awan ubat-ubatan RM70.00 + m.c. Hari Sanayan kada hingkat tulak bagawi lagi, garing / uyuh awak batarusan. Ka klinik kerajaan tapi kana ambil no. giliran kada sabar lawas batungguan lalu ka out door clinic kana lagi RM60.00 + m.c. 2 hari - dirujuk ke hospital kerajaan. Imbah tu hari-hari ke hospital - amik darah 4 kali hagan apakah kada ku tahu' , masuk banyuk 2 litre : masa tu risau pun ada maklumlah H1N1 rahat riuh sa malaya, suspect denggue + miningitis+chikunguya lagi.....wahhh payah ni. Last sekali Sabtu 2 minggu imbah tu ujar doktor ulun bebas dari 4 suspect sakit tuhh.... tapi ada lagi merisaukan 'dalam kad antara lain doctor tulis note ".....liver imp. chronical hepatitis ? cause" bila tanya doc kata tunggu result on 30/6/09. Manunggui tarikh result tuh lagi labihkurang saminggu risau jua' hati ( anak bini ulun kada tahu') tapi samantara menunggu result doc suruh cari ubat kat pharmacy ( jetepar ke abende / makan 3 capsule sehari ). Tapi sampai hari ini uyuh awak ulun nih kada sambuh sapanuhnya lagi. Amun baganak / badiam di rumah lagi uyuh. Nang herannya amun ka pagawian kalumpanan samua ka'uyuhan tuhh. Jadi rasanya gagaringan ulun kali ni (imbah lawas kada uyuh) lawas banar rasanya. Tapi ada lagi nang marisaukan ulun ... apa kaputusan pamariksaan doc 30/6/09 kaina??. Harap-harap berita + tive. Ohh...hari ni ulun asa ungah sa'ikit anak-anak ma'ucapakan 'Selamat Hari Bapa' and anak-anak ulun bakongsi sapa'adingan awan umanya manukar KFC makan n bado'a salamatan ayahnya. Amin.

TAGANANG WAYAH BAHARI

Arini 1 Mei...hari pakarja (dahulu dihiyau urang Hari Buruh). Hari urang nang bagawi makan gajih awan majikan kerajaan / swasta cuti-kada bagawi. Amun bagawi jua dibayar 3 kali gajih. Itu urang nang bagawi ada majikan, amun nang bagawi saurang atawa jadi kuli kadada mandapat cuti hari pakarja - ada gawian ada gajih amun kada bagawi kadada duit. Mambandingakan kahidupan bahari awan wayahini kaya langit awan bumi. Taganang masa kakanakan lagi, wayahitu kada tahu lagi kasusahan kahidupan - tahu ba'ungah-ungah haja'. Uma bapa bagawi bahimat mancari duit hagan mangganalakan anak. Papagian hudah tulak ka kabun manureh gatah - amun kabun saurang kada apa jua' ni kabun urang jadi pandapatannya bagi dua. Haraga gatah pulang masaitu murah, amun sabulan manureh handak dapat RM200 gan ngaleh. Hagan mancukupakan bapa (abah ku') patang bagawi ma'ambil upah malubangi tanaman gatah 'planting' awan kalapa sawit. Amun musim ba'ah lagi ngaleh kahidupan. Ari aur hujan, gatah kada bisa ditureh jadi kadada baduit. Hagan makan bahutang di kadai tokeh China. Amun makan bubur ka atawa makan hubi kayu wayah ba'ah ni biasalah. Nang bagus sa'ikit masa ba'ah ni iwak banyak. Kami sapa'adingan lalaki rahat manajur iwak haruan awan iwak kali'. Mun ma'unjun iwak papuyu gan banyak ba'ulih. Ba'ah biasanya lawas jua' - makan satangah bulan hanyar pandit banyuk. Halaman rumah banyuk sampai kalintuhut atawa mun ba'ah ganal sampai ka lantai rumah gan ada. Basampan hajak amun handak ka mana. Sapa'ingatan ulun suah 2 kali ba'ah ganal masa ari raya. Kada papanya'ai ari raya-handak tulak sumbahiyang raya gan basampan. Amun musim basawah uma bapa lagi rahat bagawi pagi patang. Pagi manureh patang basawah atawa mun ari hujan basawah pang saharian. Ulun wayahitu ba'umur 9 tahun hudah bisa manggani'i kuitan manureh awan basawah. Amun ma'ingatakan masa sakulah ulun awan ading ba'ading abah uma haja' nang kuat manyuruh. Mun panenean awan kula'an kadada nang manggalakakan. Napang sapupu-sapupu ulun inya' habis darajah 6 sakulah ampeh - lalu bagawi di estet makanya baduit,apabila batamuan panenean ma'unjuk duit - kami kada kawa mambari'i duit - lagi sakulah ya'am. Inyak umur 17 kah 18 kah hudah kawinan - kami sapa'adingan lagi sakulah. Amun kada uma bapa nang basabar dan tarus manyuruh kami sakulah mau ampeh haja' sakulah - napatia sakulah dibari'i duit 20 sen sahari - tumat sakulah pagi sampai sakulah agama patang / pukul 6 pagi hudah bajalan batis kasakulahan ada sabatu' jauhnya patang pukul 4 - 5 hanyar sampai karumah. Amun ari hujan kana bamandak di mana-mana lagi lambat bulek. Amun lambat bulek disariki abah inyak takutan ulun balalah kamana-mana. Baju hagan ari raya gan putih nyaman hingkat dipakai sakulah agama. Kasutnya' kasut plastik putih jadi basah kah karingkah kadada masalah. Imbah hudah ganal rahat sakulah tingkatan anam gan ulun lagi bagawi mancari duit saurang. Ulun sakulah sabalah patang , sabalah pagi imbah ma'umpati uma' ka kabun panurehan ( bapa wayahitu bagawi di singapura ) ulun ka kabun saurang manureh jua. Sahari dapat RM2 -3 cukup banar hagan tambang bas ka sakulahan awan babalanja. Masa manunggui kaputusan SPM kah STPM kah ulun kada bagana' di rumah kada. Tulak bagawi awan kakawanan mancari duit ka mana-mana. Macam-macam gawean nang suah diulah - bagawi kontrak suah, bagawi jadi Pak Guard suah, jadi salesman suah, jadi karani suah...jadi panyuntan haja nang kada suah!. Jadi pabila ulun ma'ingatakan samua'an kahidupan bahari babanding wayahini sajuta syukur pang nang hingkat diucapakan awan Allah SWT nang adil marancang dan manantuakan kahidupan awan rajaki hambanya. Kada suah tapikir ulun sapa'adingan bisa hidup kaya urang lain. Mun bahari sabuah beskal abah tu hajak nang baganti-ganti kami bamain waktu kada dipakai abah bagawi - sampai handak rakai kami ulah. Amun cuti sakulah imbah manulungi gawean uma bapa malastik burung di padang tagah haja gawean kami. Makan tangahari gan dihiyau hanyar bulik. Inyak kakanakan ya'am kada nya tahu kasusahan uma bapa bacari. Masa ulun bulik kampung 2 hari lapas, ulun bajalan maliati pakabunan uma bapa. Barkat sabar / jimat caramat uma bapa hingkat inya' ba'ulih kabun saurang. Habis tanah sawah awan kabun gatahnya ditanami kalapa sawit - tapi diupahakan awan urang Indon mangawi'akan. Wayahini kalupang kada sugih tapi hingkat jualah hidup kaya urang. Kada sangka uma bapa ulun hudah ampat kali ka makah, ta'umpat jua ulun awan bini ulun - amun mangganang masa bahari handak makan gan ngalih. Tarima kasih pada uma bapa nang mangganalakan kami sapa'adingan, tarima kasih jua' awan arwah datu awan panenean nang malajari mangaji malam awan lampu sumbu minya' tanah ; Al-Fatehah. Satinggi kasyukuran kami kahadrat Allah SWT nang mangurniakan kahidupan nang labih baik babanding masa bahari. Amin.

LAGU BANJAR : JAPIN RANTAUAN

LAWAS KADA BATAMUAN

Ulun handak bacarita bubuhan kami batamuan imbah sudah lawas kada batamuan. Cuti sakulah nang hanyar lalu di kampung kami ada kula' sabalah padatuan ba'ulah majlis kawin anaknya'. Maka padatuan kami manjamput segala bubuhan kula'an nang inyak ingat. Nang ada batinggalan nomor talipon ditalipon, mana nang ada hanya alamat diatari kad jemputan umpat alamat nang ada, nang hingkat dikirimakan awan sesiapa' dikirimakan. Maka majlis kawinnya hari Sabtu sahari sabalum sakulah dibuka' - maka datangan nai samua bubuhan nang dijamput. Kabatulan di kampung ari tu ada 2 - 3 tampat urang ba'ulah majlis kawin jadi bubuhan nang datang jauh / kada suah datang / lawas sudah kada datang puaslah batakun mana rumah padatuan tadi. Ada jua' nang tarus turun matukah tarus duduk makan (kada batakun hulu tu rumah siapa') sudah imbah makan hanyar mancari tuan rumah - hanyar tahu' salah rumah rupanya - kasupanan kula' kita tu, mambari'i jualah duit sambil basalam awan tuan rumah. Imbah sampai ka rumah padatuan nang bujur hudah kanyang napa lagi diulah - bapandiran hajalah. Di halaman rumah padatuan maka ya'am bahanggangan matukah macam-macam plat- ada nang datang tumat utara, pantai timur, KL , Singapore gan ada jua. Jadi takumpulan banar bubuhan kami. Nang asa tangalih sa'ikit anak-anak kamilah, inyak kada bisa basurah banjar ya'am maka tanganga banaran manadangarakan urang bapandir. Ujar anak ku' ayah ni cakap Sarawak ke?. Na daitulah jadinya amun anak cucu kita kada tahu basurah banjar. Mesej - jangan supan mangaku awan basurah banjar mun batamuan bubuhan.